Epea martxoaren 31ko 14: 00ak arte dago zabalik.

Laguntza helbide soziala eta fiskala Araban edo, gutxienez, jarduera-zentro bat Araban duten enpresa edo pertsona autonomoentzat da. Eratu zenetik gutxienez urtebete igaro bada.

Berrikuntzako eta digitalizazioko jarduerak diruz lagunduko dira, Arabako produkzio-sarearen modernizazio ekonomikoa eta lehiakortasuna hobetzeko, honako hauen bidez:

• Teknologia digitalen erabilera intentsiboa (4.0 industria): automatizazioa, urrutiko monitorizazioa, telelaguntza, telelana, zibersegurtasuna, big data, fabrikazio gehigarria eta 3D inprimaketa, robotika kolaboratiboa eta malgua, adimen artifiziala, errealitate areagotua eta errealitate birtuala, cloud, sistema ziberfisikoak edo gauzen internet.
• Berrikuntza produktuan edo zerbitzuan: enpresarentzat berriak diren produktuak/zerbitzuak merkaturatzea, edo dauden produktuen ezaugarri eta erabilerei dagokienez nabarmen hobetuak, enpresaren produktuen katalogoan sartzeko eta merkaturatzeko asmoz.
• Prozesuak: ondasunak eta zerbitzuak ekoizteko prozesuak ezartzea, logistika eta banaketakoak, marketin eta salmentakoak, informazio- eta komunikazio-sistemak, administraziokoak eta kudeaketakoak, edo berriak diren edo hobekuntza nabarmena dakarten produktu edo zerbitzuei laguntzeko jarduerak.
• Beste batzuk: trantsizio ekologikoaren aldeko neurriak, erakundearentzat berritzaileak diren gizarte-erantzukizun korporatiboak, eta izaera berritzailea edo produktibitatearen edo lehiakortasunaren hazkundeari egiten dion ekarpena argudiatu beharko dute.

Honako hauek ere diruz lagunduko dira:

– Kontratazioan egindako kanpo-gastuak. Softwarea eta ERP edo antzekoak eta lizentzia informatikoak eskuratzea.
– 100 langile edo gutxiagoko enpresentzat, ibilgetuan egindako inbertsioak (makineria). Leasing bidez eskuratu ahal izango dira.
– Barne-gastuak (ikertzaileak eta/edo teknikariak eta/edo sortzaileak), deialdi honetara aurkeztutako berrikuntza-jarduketaren baten diseinuarekin, garapenarekin, egikaritzearekin, jarraipenarekin eta/edo ebaluazioarekin lotutakoak.

Laguntza esleitzeko prozesua norgehiagoka bidezkoa da, eta dirulaguntzaren zenbatekoa % 10 eta % 40 artekoa da, proiektuaren balorazioaren, enpresa motaren eta inbertsio motaren arabera.

Arabako Foru Aldundiko Ekonomiaren Garapen, Berrikuntza eta Erronka Demografikoko Sailaren laguntzak.

LABURPENA2_ALAVA INNOVA

Amurrioko Udalak, Eusko Jaurlaritzak finantzatuta, ‘Konpondu.amurrio’ proiektua jarri du abian. Proiektuaren helburua udalerriko egungo kontsumo-eredua aldatzea da, jasangarriagoa izan dadin. Webguneak lau gune nagusi ditu: auto-konponketa sustatzeko, ordezko piezak erosteko, konponketa-establezimenduak bilatzeko eta esteka interesgarriak.

http://konpondu.amurrio.eus – http://amurriorepara.amurio.eus webguneak gure produktuen bizitza luzatzeko informazioa, aholkuak eta tresnak eman nahi ditu. Horren barruan, Amurrion konponketan jarduten duten establezimenduen bilatzaile bat dago, hainbat kategoriatan banatuta eta udalerriko konponketa-negozio guztiak ikus daitezkeen maparekin.

“Webgune horren oinarria konponketa lanak egiten dituzten udalerriko negozioen bilatzailea da. Bertan, konpondu nahi dugun produktua tekleatuz, zein kategoria bilatu nahi dugun aukeratuz edo udalerriaren mapan zuzenean, produktu hori konpontzen duten establezimenduak bilatu ahal izango ditugu. Hor agertuko dira establezimenduak, horien informazio orokorra, ze produktu konpontzen dituen, non dagoen, ordutegia eta kontaktua” azaldu du Txerra Molinuevo Amurrioko alkateak.

Proiektu honekin hainbat helburu lortu nahi dira:

• Herritarrei berrerabilerarako aukera praktikoa eskaintzea.
• Herritarrei prebentzioaren eta jasangarritasunaren aldeko ohiturak helaraztea.
• Bigarren eskuko objektuen trukea duintzea.
• Hondakinak tokian-tokian eta egunero sortzea prebenitzea.
• Kontsumo jasangarria
• Produktuen balio-bizitza luzatzea.
• Lehengaien eta energiaren kontsumoa murriztea.
• Konponketa- eta autokontratazio-zerbitzuak eskaintzen dituzten tokiko negozioak ikusaraztea eta horien erabilera sustatzea.

“Alferrik galtzearen kultura nagusi den munduan bizi gara.  Zerbait apurtzen denean, bota eta gauza batzuen ordez beste batzuk eskuratzen ditugu, estreinatzeko eta kontsumitzeko dugun beharra asetzeko. Gaur egun bizi dugun klima-krisi egoeran, beharrezkoa da gure kontsumo-eredua aldatzea eta bota baino lehen konpontzen duen beste eredu arduratsuagoa ezartzea. Hori dela eta, ‘Konpondu.amurrio’ proiektua funtsezkoa da produktuei bigarren bizitza emateko eta mundu jasangarriagoaren, bidezkoagoaren eta solidarioagoaren alde egiteko”, adierazi du Molinuevok.

Amurrioko Udalak herritarrei zuzendutako zenbait gomendio egin ditu, udalerriko merkataritza ahalik eta jasangarriena izan dadin. Kanpainak Arabako Foru Aldundiaren laguntza du.

‘Merkataritza jasangarria Amurrion’ kanpainaren helburua erosketa bat egiten dugun bakoitzean keinu txikien atzean ezkutatzen den ingurumen-aztarna murriztea da. Gomendio nagusia tokiko merkataritzan kontsumitzea da. Hurbileko kontsumo hori oso lotuta dago kontsumo arduratsuarekin, ingurumenari, tokiko ekoizleei eta udalerriko enpresa txikiei laguntzen dielako.

Merkataritza jasangarria izaten laguntzen duen beste keinuetako bat tiket digitala eskatzea da. Ordainagiri digitala errealitatea da dagoeneko, eta jasangarria izateaz gain, seguruagoa eta praktikoagoa da. Horrela, txartelarekin egindako ordainketen kopiarik ez eskatzea ere gomendatzen da, ordainketa zuzena dela ziurtatzeko osagarria besterik ez baita, eta ez da beharrezkoa erreklamazioak egiteko.

Azkenik, jasangarria izateko beste aukera batzuk, edozein erosketa egiterakoan orga, motxila, saski edo oihalezko poltsa berrerabilgarriak erabiltzea dira. “Amurrioko Udalak jardunbide erraz horiek jarraitzeko deia egiten die herritarrei, guztion artean merkataritza eta udalerri jasangarriagoa lor dezagun”, adierazi du Txerra Molinuevo Amurrioko alkateak.